27 de abril de 2000

Kilimandscharo 2000 - A Büldbericht von Georg Sommeregger

2000 woama am Kilimandscharo. Es folgt a Büldbericht. Dos gonze is in KEANTNARISCH, auch bekannt als KAERNTNERISCH, gesprochen in Oesterreichs suedlichstem Bundesland ('Urlaub bei Freunden'). Eine Hochdeutsche Version fuer unsere Freunde ist in Arbeit. Fuel Spass!

What you see here is the CARINTHIAN version, which is the lingo spoken in Austria's most southern province, CARINTHIA (or KAERNTEN in German). An English version might follow later on. Enjoy!



Wir sein zuerst mitm Fliga von Johannesburg nach 'Kilimandscharo International' in Arusha/Tansanien gflogn. Do woa schon im Fliaga a murdstrara, beim Aussteigen sein uns die Muckn schon Spalier gstondn. Guat doss i a Malariavorsorge mit hob, hob i ma gedocht. Wir hobn donn a Wochn in an Luxushotel (Hotel Impala) in Arusha gwohnt und mit dem LLM (dem Uniprogramm) das Kriegsverbrechertribunal fuer Ruanda ongschaut. Dos wor gonz schen interessant. Akklimatisieren homma uns a schon kennen, Arusha liegt jo ungefehr auf 1500 meta.

Tansanien is natierlich a supa Lond, man sigt jo schon die Schiraffn am Heckfliagl, und dos Lond is jo gesegnet mit ollen meglichen Naturwundan, z.B. dem Nationalpark Serengeti. Dos schau ma uns sicher naechstes Mol on. Diesmol woa jo der Berg staerker, und als Oesterreicher hob i natirlich aufi miassn.

Fuer so a Expedition braucht man natirlich a gscheite Ausruestung, und do mecht i mi glei beim Franz und bei der Anita bedonken doss sie mir so huelfreich unta die Orme gegriffen hobn. Danke auch on den Papa fuer die dicke Jacken! Die Sochen hob i donn a olle am Gipfel gebraucht, do wors schon saukolt.

Wir sin im April (2001) auffegongen, und dos is jo normalerweise nit grod die beste Zeit, weil Regenzeit. Wir hobn oba unglaubliches Glueck mitn Wetter ghobt, es hot nur gonz wenig gregnet und meistens in der Nocht wenn ma trockn in da Hittn worn.

Mir hots in Arusha sehr guat gfolln. Dos Problem is vielleicht doss es kane, oba a goa kane Gschefte im westlichen Sinn gibt, also is es schon besa wenn man olles schon fuer die Expedition mit hot. I bin an gonzen Nochmittog durch die Stodt gront um a Battarie fuer die supa neiche Stirnlampn (braucht a Blockbattarie), und am Ende hob i ma dos aufs Hirn pickn kennen. Gleichzeitig hob i oba a supa Stodtfuehrung ghobt.

Wie kummt man donn oba aufn Berg? Gonz so anfoch is dos nit, vor ollem preismaessig. Man konn jetzt a nimma allan aufferennen, a Fuehrer is gesetzlich vurgschriebn. Und sowieso empfehlenswert. Die kennen sich do schon aus. Unser Fuehrer, da Richard (genonnt 'teacher', wos sovuel wie a Ehrennomen fuer Gelehrsamkeit is) woa schon ueba 200 Mol obn! Do is glei sei Adress, i konn ihn nur weitaempfoehln (und an guatn Preis hota uns a gmocht):

Richard is official mountain guide and organises everything you need, the only thing YOU have to do is walk!


richard.nguma@privatesafariclub.com
www.privatesafariclub.com

Dos Bier is eigentlich gonz guat in Tansanien. Villacher is kans, oba donn is jo Villach a nit in Tansanien, oda?

Und do wor a donn endlich - DA BERG. Togelong wora immer in Wolkn gehuellt, oba donn wora am Obend, und nur fuer a stund oda so, zu segn. Bei Sonnenuntergong leichtet er donn rosa, und do hob i dos obige Foto gschossn. Dos is schon a eigenortiges Gfuehl, man steht mittn in Afrika und do is diesa unglaubliche weisse Berg.

Die Afrikaner kennen ihn natirlich schon seit immer, aber fuer die Europea is a erst Mitte des 19. Johrhundats entdeckt wurdn. Die Mitglieder der Royal Geographic Society hobn den Missionar der den 'schneebedeckten Berg suedlich des Aequators' gmoeldet hot nur ausglocht. Donn wors oba doch woa, und 1889 wor die Erstbesteigung, unser Londsmonn Ludwig Purtschellerr zammen mit an Deitschn, dem Hans Meyer. Dummerweise sin olle Gedenktofln aufn Kili nur fian Meyer, gsponsert von einer deitschen Gsoellschoft. Da Ludwig Purtscheller steht nur in Klomma.

Der Berg woa urspruenglich auf kenianischem Gebiet, donn hot oba, und heats guat zu, dos is a supa gschicht, die Kenigin Victoria von Englond ihrm Enkerl Wilhelm, dem depperten Kaiser, a Freid mochn wolln und hot ihm anfoch den gonzn Berg gschenkt! Tansanien woa bis 1914 a deitsche Kolonie.


Dos is da Blick vom Hotelzimmer aus. Dos erste wos i im Hotoel gsegn hob woa a oltes Plastiksackl vom Sport Eybl in Wien, und a Pickerl von der Rose vom Woerthersee. Bin doch nit da erste do... Togelong hob ma vergeblich Ausschau koltn, gegen Ende der Woche endlich a Blick aufn Berg! jau!


Vur da Obreise hob I natirlich a noch ondare Sochn zum tuan ghobt. An Salot vatrogt jo a nit jeda...man beachte dos Klomandl....

Unta da Wochn sin wir donn anfoch in a Reisebuero in Arusha gongen, hobn a bissl gfeilscht (es woa gut doss meine Freind olle Suedafrikana sein, do hom sie donn a bissl weniga valongt), und doss woas a schon. Im ollgmeinen bucht ma a gonzes Paket, dos hasst an Pauschalpreis fia Transport zum Berg, Essen und Trinkn, Parkgebuehrn (vadommt teia, ungef. 20 Dollar), Bergfuehrer, Trega, und Hittngebuehr. Bis auf die Ausruestung braucht ma sich fost um nix kimmern, Gamaschn und Stecken konn man direkt am Eingong vom Nationalpark mietn.

Am Sunntog wors olso so weit, mitn minibus hom se uns in da Fria obgholt und wir san mit an Offenzohn Richtung Moshi, dos wos die Stodt direkt beim Kilimandscharo is. Untawegs homma Vapflegung eingekaft. Aufm nehgstn Bueltl segts die gonze Monn- und Frauschoft: v.l.n.r. Georg Sommeregger, Morne van der Linde, Maureen Tong und Frans Viljoen. Wia samma olle von da Uni Pretoria und wolln so den Glonz der Menschenrechte in da Woelt vamehrn!

THE TEAM: GEORG SOMMEREGGER, MORNE VAN DER LINDE, MAUREEN TONG, FRANS VILJOEN










Strassenszene Moshi


























Da Frans und da Morne frein sich schon: aufm Pickerl hassts 'I LOVE UHURU', oba da Tepp vom Photobuero hot dos schlecht und noch dazua seitnvakehrt gescennt. Oba is jo wurscht.

Sticker reads: I LOVE UHURU





do geht's weita

Kilimandscharo 2000 - Tag 1

(was bisher geschah: wir bereiten uns auf die Expedition am Kilimandscharo vor)

1. TOG: INDIANA JONES

Wia hobm uns fuer die 'Touristenroute' entschieden, und fia a Paket von 4 Naechtn und 5 Togn. Mitn akklimatisieren is dos holt schon a bissl knopp. I hob vurm Auffegehn a dickes medizinisches Dossier ueba Hoehenkronkeit und Hoehenbergsteign im ollgemeinen glesen (danke, Franz!), und hob mi gonz schen gfiachtet fua Lungenoedemen oder sunstige Hirnplatza. Sobold ma oba an zwa Tog untawegs worn und i gsegn hob doss es guat geht woa olles ok. Hoehenkronkheit is jo mehr a Gluecks (oda Pech) soche. Man konn fost nix trainieren dafuea, ongeblich hot a Raucha oda Untrainierta kane schlechteren Chancen. Oba dos hasst jetz nit doss ihr zum Rauchn onfongen sollts, bittegorschen. I rauch nit mehr und hobs a gschofft. Oft hobm junge trainierte Maenner mehr Schwierigkeiten weils Hirnkastl mehr Sauerstoff braucht und obn is holt nit vuel davon. Frauen hobn statistisch gsegn bessare Chancen.

Da Eingong zum Nationalpark liegt so auf 1700 Meta. Wir sein so gegen Mittog durt gwesen, man trogt sich ins Biachl ein (ziemlich vuel Franzosen und Deitsche und Englaenda, oba a Oesterreicher, eh kloa), unser Fuehra Richard hot die Traeger ongheiert, und donn is schon losgongen. Da Tog wor a bissl wolkenvahongen, und wirklich hots streckenweise gregnet, oba nit vuel. I hob an anfochn Gummiponcho mitghobt, der woa praktisch.

Am ersten Tog geht man nur a poa Stunden, oba olles durchn Dschungel! Tropischa Regenwolt wie im Bueldabuch. A Spinn sogt hallo, da Gummibam losst griassn.



Im Summa solls jo do gonz hass sein, bei uns woas ganz ongenehm. Kuaze Hosn, Uebahosn, T-Shirt. Und vuel Wossa. Wossa is vielleicht da Schluessl zum Berg, 4 Lita gehn schon. Wia hobn a vurbeugend 'DIAMOX' gnommen, wos den Ruf ana Wundadroge gegen Hoehenkronkheit hot. Dos wichtigste is oba wohl da Respekt vurm Berg (I hob va sucht mit ihm zum redn, dos hot gekloppt). Und longsom gehn, gonz petschaste. Chi va piano va sano e lontano.

























Alptraum














Do hob I donn mein erstn Hehnrausch kriagt. JUPPI!

































Wos ma nit so olles findet... A uriges Gedachs. Wenn man durchn Dschungl durch is fongt donn ploetzlich die alpine Fauna on. Man fuehlt sich fost wi daham in die Olpn, nur doss olles wos wogst vuel gressa is. Da Erika wogst da ibn Kopf.
















Fiecha sigt ma a. Gonz no bei da Hittn woan die Colobus Offn, es gibt schwoaze und weisse. Im Bueld hupft a weissa zu sein Medl, und dos woa wohl onsteckend... back to nature!







































krautis inidentificatus






















protea wunderschönis













weiter zu Tag 2

Kilimandscharo 2000 - Tag 2

Was bisher geschah: wir kämpfen uns durch den Dschungel...

2. TOG: 3000 META UND MEHR


Blick von da Horombohittn ins Tol. Unta uns liegt Tansanien.

Weckn is so gegen 6 oda holb 7, donn a guates Fruehstueck. Gschlofn homma guat in unsere komfortablen Hittn. Man konn jo zoeltn oda in Hittn schlofn, auf da Touristenroute san sowohl die Wege als a die Installationen 1a. Die Hittn san fia jeweils 4 Personen, Matrotzn und Polsta san do, es gibt a grosse Gemeinschoftshittn, und die Klos hobn Wossaspuelung. Also wir hobn guat gschlofn in da Mandara hittn und gehen am 2. Tog wieda 1000 Hoehenmeter, also von 2700 auf ungefea 3700.

Der Weg fuehrt durch alpine Flora, teilweise schauts auf wie in Schottlond, die Highlands. Viel Moor. Nach 4 oda 5 Stunden (dos is so die durchschnittliche Togesstreckn, also wirklich gmiatlich, und steil is erst am letzten Tog) kummt man bei da Horombohittn on. Bei da Onkunft woatn die Traega imma schon mit unsam Gepaeck (wir gemma nur mit an klan Rucksock), Tee und... Popcorn!


Die Fuehra und Trega



Blick von da Horombohittn aufn Mawenzi, an von die drei Gipfel am Kilimandscharo. Kilimandscharo hasst jo eigentlich dos gonze. Da Mawenzi is wundaschen und a technisch onspruchsvoll, unsa Zuel is oba da Kibogipfel, der a da hechste is. Im Vurdagrund die Hittn, dazwischen dos Gedachs wie im Asterix.


Ok, gemma weita!




Essen wie im Grandhotel (die Maus ist nicht im Bild)


Blick von der Horombohuette zum Kibo in der Frueh


A taste of Schottland?






Kleiner Krater


Wegaufschuetten


Vulkangestein... und die kleine Raupe Nimmersatt (unten)



weita zum 3. Tog

Kilimandscharo 2000 - Tag 3

(was bisher geschah: wir haben gut geschlafen)


3. TOG: DESTINATION MOND



Dos Photo is von circa 4000 meta. Da dritta Tog geht von da Horombohittn (3700) bis zur Kibohittn (4700), und donn is es bis zum Gipfel a nimma weit. Irgendwonn heat die alpine Flora auf, Nebel, leichter Regen, du gehst a klane Kuppn auffe und pletzlich bist du aufm Mond! A steinerne Hochebene wo fost nix mehr woxt. Du gehst dahin, die Luft is schon duenn, die Stille is fantastisch. I geh mit die Steckn, an Schritt nochn ondan, ganz gemiatlich, trink sovuel I konn, kontrollier den Puls (hob a Pulsuhr mit), olles normal. Togesdistanz heite 5 bis 6 Stunden.



Bei guata Sicht ... the road to Kibo




Da Berg scheint greifboa nahe (oben), oba noch gemma dahin (unten).





Maureen und Richard


letztes Heisl vurm Gipfel


weiter zum letzen Teil



Kilimandscharo 2000 - Nocht 3 und Gipfl

Was bisher geschah: wir sein schon ziemlich weit obm...

3. NOCHT: ZUM GIPFL

Die Kibohittn is auf 4700 meta. Wir worn so gegen 3 am Nochmittog durt, san donn noch a bissl hea auffegongen. I hob dos jeden Tog gmocht noch dem Motto 'Climb high, sleep low', dos hasst man soll immer a bissl tiafa schlofn wie man auffegongen is um bessa zu akklimatisiern. Um 5 Uhr hots donn schon Obndessn gebn, und um sexe worma im Bett. A jo, noch a Tip: nehmts ane Ohrnstoepsl mit, do schloft ma wi a Bebi. Ana schnorcht imma. Ana hot imma Bohnensuppn gessn.

Um 11 Uhr woa weckn, und um Mittanocht samma los aufn Gipfl. Die Nocht woa sternenkloa oba mueld. Beim Auffegehn hot ma bis zur Stodt obegsegn. Weil fost Vollmond woa hob ma die Stirnlompn goa nit gebraucht. Im Prinzip geht man a Kratawond auffe, durch a Schottafoeld, und vadommt steil isses a. So gegen holb 6 samma donn am Kratarond onkummen. Und glei freindlich empfongen wordn:



Vom Gilman's Point, der offiziell schon als Gipfelbesteigung zoehlt, geht man donn noch ane bis anaholb Stunden auffn hechstn Punkt, den Uhuru Peak. So gegen 3 isses wirklich koelta wurdn, oba jetzt, so knopp vua Sunnenaufgong woas echt saukolt. Beim Ummekwehrn aufm Grad homma gonz schen gforn, da Wind geht durch und durch und do hoelfn a die bestn Handsch nix. Oba wurscht, da Gipfel is nah, und i loss eich jetzt in Ruhe die Bueldn schaun.

Wir hobns olle vier zum Gipfel gschofft, und dos is schon a schenes Teamerlebnis. Die Maureen is a bissl speta am Gipfel gwesn, wir hobm wegen da Koeltn nit lenga als 10 Minuten obnbleibenkennen. Bei und noch Sunnenaufgong woa donn fantastisch!

























Dos woas. Und dos woa wirklich wos. Wir san donn relativ schnoell obgschtign, im Schottafoeld is ma fost da Soft ausgongen, und so gegen holb 10 woa ma wida in da Kibohittn. Dos Popcorn woa leida aus. Noch ana kurzn Rost (du bist so aschepft dos du glabst jetz is aus) samma donn bis zur Horombohittn obgschtign und am naechsten Tog wida gonz obe.

z'ruck zum Start